Konsep Teori Segi Tiga Semiotik Disempulangka Enggau Chunto Ti Seriran

 

Bepelasarka kar ba atas tu, mandangka chara ngena teori Segi Tiga Semiotik ( Ogden & Richard 1923) . Nyadi ba kar tu, simbol (leka jaku ) “mayau” tu diperagam tauka diperundingka untak mensia nengah konsep, lalu ulih meri referens senentang bakani gaya objek ti udah diperagamka sekalika bebulu lebat, bechura chelum,penempa iya enggau utai bukai. Uji perati kar di atas tu , bisi ngembuan garis putus-putus entara simbol enggau referens. Kebuah pia, iya bisi ngundan guna tauka fungsyen lebuh begunaka teori tu. Reti nya, teori tu nadai ngembuan kaul ti terus laban runding siku-siku mensia ngagai siti-siti pekara jauh bebida lalu ngembuan persepsyen ti enda sebaka.   Ambika chunto ngena leka jaku “ mayau” ,      responden A mikirka “ mayau” bechura chelum lalu responden B mikirka “mayau” bechura burak. Taja pan pia, mensia tu ulih meragam reti leka jaku “mayau” iya nya utai idup tauka jelu, semina bebida lebuh meri peragam senentang penteba ngagai siti-siti simbol ti udah kala diperatika iya. Nya alai, garis putus-putus tu mandangka simbol enggau referens tu enda ulih ngenataika tukuh tauka reti entap laban dalam runding mensia ti enda sebaka.

Tang enti lebuh kitai beratika garis ti nadai putus-putus tauka ngembuan reti ti menyana mega ulih manggum reti ti entap sereta sebaka dalam persepsyen untak siku-siku mensia. Ambika chunto, buah tunjuk langit. Leka jaku “buah tunjuk langit” tu nyadi simbol ti dipeda mensia lalu meri proses dalam konsep tauka pikir mensia senentang pemereti nengah leka jaku lalu ari konsep ti diulih sida nganjung ngagai referen iya nya objek “buah tunjuk langit” sebengkah ari bansa buah ti idup tumbuh ba kampong. Retinya, ari gelar “buah tunjuk langit” tu ulih meri konsep ngagai mensia lalu meri referens ti sebaka sereta nadai ngembuan penemu ti bebida ngagai objek ti sebaka mina gelar diberi bebida nitihka munyi jaku siti-siti raban bansa. Nya alai, leka jaku tu enda begunaka garis putus-putus laban ngembuan reti ti entap sereta menyana ti ulih diperagam untak mensia ngena chara ngelai ti sebaka.