SEJARAH PEMANSANG JAKU IBAN

                                                        Sejarah Pemansang Jaku Iban.

Jeman Perintah Brooke.

  Lebuh rajah Brooke merintah menua, jaku Iban endang udah nyadi lingua – franca ba menua Sarawak. Mayuh pupu raban bansa ba Sarawak bekomunikasyen enggau pangan diri dalam pengawa sida sehari – sehari. Pengawa ti sehari – sehari ti bekenaka jaku Iban iya nya bejaku, berandau, bejalaika pengawa perintah, bedaja, bedagang, dikena baum , dikena ngerembaika pengarap Kristian enggau dikena nyadi ke jaku dalam pelajar sekula kelebih agi sekula misyen enggau sekula ba menua pesisir. Ketebal agi sekula ba genturung pendiau Iban di menua pesisir dipejalaika orang putih dikena sida ngerembaika pengarap Kristian maya jeman nya. Maya jeman perintah Rajah Brooke, ulih ditesa ngena tunjuk bansa kitai Iban ke bisi ngembuan pemandai sekula. Nya alai maya jeman Brooke bup ti bekaul enggau jaku Iban endang ditulis bala orang putih ke benung bejalaika pengawa sida ba sebelah endur dalam ba menua Sarawak. Sekeda bup ti udah bisi dichelak maya jeman nya iya nya :

1.    Bup Dictionary Iban – English  ti ditulis D.J.S Bailey seduai W. Howell dalam taun 1900.

2.    Bup ti dikumbai “ Tangga Serega” ti ditulis dalam taun 1936

 Jeman koloni British.

   Maya jeman koloni British, guna jaku Iban udah ngerembai lalu betambah besai agi. Kelimpah ari guna ti baka udah diterangka ba jeman Rajah Brooke, jaku Iban nyau dikena  ngatur pechara, dikena naburka program ari Bagi Iban, Radio Sarawak, dikena ngarang mayuh bup ti dikeluarka opis Borneo Literature Bureau(BLB) ti ditumbuhka dalam taun 1958 enggau karang ti bukai baka Surat Pemberita ti dikeluarka Opis Pemadah.

     Guna jaku Iban ti berupai nyengala besai agi iya nya lebuh jaku Iban dipasuuka dalam sistem pelajar sekula maya nya nyadi siti ari Asian Language dalam peresa Sarawak Junior Certificate Of Education dalam taun 1957 lalu dikemendarka kunsil Nengeri nyadi mata pelajar pilih (optional subject) ba Palan Pematih Pengajar Batu Lintang Kuching. Bebida enggau jeman Rajah Brooke,  bansa Iban udah mayuh ngembuan pemandai sekula. Tambah mega, perintah koloni digi ngansak bansa Iban nulis lalu ngarang “karya” sida dalam jaku Iban kelimpah hari ti ngena jaku bukai baka jaku English ti benung ngerembai maya nya.

   Maya jeman koloni British tu, Biro Litaricha Borneo(BLB)  ditumbuhka dikenan nangkup pemansang dalam pengawa nulis. Tuju BLB tu ditumbuhka iya nya nyadi  ke palan ti bempu tanggung pengawa ngumpul sekeda jerita enggau litaricha jaku etnik di Pulau Borneo. Mayuh bup udah dichelak maya jeman tu ditulis bala penulis Iban enggau Orang putih.

     Sepengudah merdeka.

   Maya jeman Malaysia, guna jaku Iban nyau majak ngerembai, majak ngerekai ari siti jaku ti semina dikena bekomunikasyen nyadi siti mata pelajar ba sekula sereta dikena dalam pengawa dagang baka ti dikena ba radio Cats.fm , majalah Pegari, majalah Tebilang enggau ti bukai. Kelimpah hari nya, jaku Iban mega bisi guna ke bukai sekalika guna perintah dikena bejalaika pengawa mtauka kompeni dikena nambahka penatai pemisi sida.

  

   Lebuh Sarawak udah merdeka, mayuh bansa Iban ke pandai, andal, angkun sereta temegahka jaku diri bekira lalu berundingka atur enggau langgur penemu dikena ngemansangka jaku Iba. Berindik ari nnya, bala sida ti ngembuan peneleba ti mayuh, ngembuan penemu ti dalam sereta bisi pengangkun jaku Iban numbuhka siti gerempung ti dikumbai Society of Advancement of the Iban Language (SAIL)  dalam taun 1964. Nangkan ke nya, dalam taun 1966 bisi siti gerempung ti dikumbai The Society For The Promotion of the The Iban Language ditumbuhka ngambika bisi pemansang lalu ngerembaika jaku Iban ( Asmah, 1981).

     Dalam taun 1987, bala pengajar bansa Iban numbuhka siti agi gerempung ti dikumbaiIban Language Teacher’s Association. Gerempung tu mayuh merambu pengawa ti udah ditaga deka dikereja tang gerempung tu enda mukai – mukai baka gerempung ti dulu ari tu mega, enda temu tunga agi. Kelimpah hari nya, mayuh nama anak Iban ti baru – baru nyadi penulis bup Iban  nambahka raban sida ti udah dulu agi ngaga sempama abi jari enggau indik aki kaki maya jeman – jeman ti dulu ari nya. Penemu enggau runding sida diengkahka ba mayuh leman karang sekalika bup teks, majalah, novel, ensera, diksyenari enggau sekeda kereban bacha ti bukai.

      Pengudah menua Sarawak merdeka neresa Malaysia kena ke 31.Ogos.1963, jaku Iban enggau sastera tauka budaya Iban majak ngerembai enggau jampat. Maya tu meh subjek jaku Iban dikemendarka nyadi subjek tambahan dalam KBSR nitihka polisi ti ditulis dalam surat pekeliling 35/JP/1585/1987 ti dikeluarka Jabatan Pendidikan Sarawak kenaka 13/5/1987. Beduduk ari surat pekeliling nya, jaku Iban diajar ba sekula nyadi siti ari subjek “bahasa tambahan”. Jaku Iban tu diberi status sama enggau jaku China enggau jaku Tamil. Nya kebuah bala kitai Iban ti gawa ba Jabatan Pendidikan Negeri Sarawak( baka encik Francis Mancha) , bala pensyarah maktab perguruan begulai enggau bala pengajar ke udah dipilih nyadi JU tauka jurulatih utama enggau saup ari Dewan Bahasa dan Pustaka nyengkaum Tun Jugah Foundation maya nya benung kiruh amat nyendiaka kereban kena ngajar jaku Iban ba tikas diploma Maktab Perguruan kelebih agi Maktab Perguruan Rajang.

   

   Sistem sepil ti belalauka Bup Atur Sepil Jaku Iban ti dikeluarka Dayak Cultural Foundation kenaka taun 1995 suba .Diatu jaku Iban bisi atur sepil kediri empu tang taja pia, bala tuai Iban ngasaika sistem nya empai tentu entap amai sereta bedau chukup kukuh dikena napi pemansang dunya kemaya hari. Agi mayuh aspek dalam sistem sepil ulih digaga manah ka agi ngambika majak entap sereta tegap agi. Nya alai, Komiti Ortografi Jaku Iban Sarawak ditumbuhka. Ari nya, sida lalu numbuhkka siti komiti pengereja pengawa ngambika bisi mekuh atur enggau pengawa ti nempa sistem sepil jaku Iban.

   Ba bidang pelajar sekula, jaku Iban nyau udah sama tinggi enggau jaku China enggau Tamil. Nembiak keterubah belajarka jaku Iban ba pom empat taun 2006. Maya taun 2007, jaku Iban udah bisi dalam peresa SPM. Maya nya, bala pengajar sama begulai enggau bala nembiak ngambi peresa jaku Iban. Ba sekula primari, subjek Jaku Iban sigi udah maju agi enti dibanding enggau ba sekula sekondari. Bala pengajar jaku Iban  ba primary mayuh agi enti dibanding enggau sekula primari.  Kelimpah hari nya, ba institut pelajar tinggi, jaku Iban udah nyadi subjek major. Siti palan ti ngembuan pelajar major jaku Iban iya nya Institut Pematih Pelajar Kampus Rajang ba Bintangor.